लघुकथा: जमेका सम्बन्ध

 लघुकथा:

#जमेका_सम्बन्ध

                  ✍️ मुरारीराज मिश्र

 नेत्रप्रसाद अवकाशप्राप्त कर्मचारी । दुई छाेरा र दुई छाेरीका पिता । आफूले गर्नुपर्ने छाेरा-छाेरीका जिम्मेवारीहरु सबै पुरा गरिसकेका । काठमाडौं आधा राेपनी कम्पाउण्ड सहितको सुबिधा सम्पन्न तीन तले घर । नातिनातिना का धनी । भाैतिकरुपले उनलाई कमी त केही थिएन, बस् केवल एउटै पीडा थियाे बुढेसकालमा श्रीमती नहुनुकाे । उनकी श्रीमती अघिल्लो बर्ष काेराेनाकाे सिकार भएकी थिईन् । 

दुई छाेरा संगै बस्थे । घरमै साझेदारीमा एउटा कम्पनी चलाउँथे । दुबैमा राम्रो मेलमिलाप थियोे । नेत्रप्रसादले छाेराकै कम्पनी खाेल्ने क्रममा घरजग्गा छाेराहरुकाे संयुक्त नाममा पास गरिदिएका थिए । अघि दिएपनि पछि दिएपनि सम्पत्ति खाने उनीहरुनै हुन् भनेर जागिरे जीवनकाे कमाइ पनि उनीहरुकै कम्पनीका लागि खर्चिएका थिए । जिन्दगी चल्दै थियोे । नेत्रप्रसाद आफ्ना कुलका र परिवारका जेष्ठ सदस्य भएकाले नातागोता, ईष्टमित्र, कुटुम्ब र आफन्तजनहरु प्रायःजसो घरमा आईरहन्थे । यसले उनलाई पत्नी वियोगकाे पीडा भुल्न केही सघाएको थियोे ।

एकदिन राति सुत्नु अगाडि उनी आफूले दिउसो घाम ताप्न बस्दा छतमा छाेडेकाे रामायणकाे किताब लिएर आफू सुत्ने तल्लो तलामा ओर्लंदै थिए । भरेङ नजिकैको जेठो छाेराकाे काेठाबाट आएकाे आवाजले उनी राेकिए । कान्छो छाेरा दाजुसंग भन्दै थियाे- "दिनहुँजसो बुबालाई भेट्न आउने पाउनाहरुले बुहारी दिक्क मान्दै थिइन् । अफिस जान र घरकाे काम भ्याउन गाह्राे भयाे रे । भाउजुलाई पनि सकस छ । बरु बुबालाई जेष्ठ नागरिक आश्रममा पाे राख्ने हाे कि दाइ ?" एकछिनकाे माैनतापछि जेठोकाे स्वर सुनियो - "तिमीहरू सबैको धारणा यही हाे भने, यसबारेमा बिस्तारै बिचार गराैंला नि त !" नेत्रप्रसादमा अब अरु थपकुरा सुनिरहने साहस भएन, भारी मन लिएर उनी ओर्लिए ।

घरमा कलह बढ्ला भनेर उनले याे कुरा मनैमा राखे । एकहप्ता पछिकाे एक बिहान उनको १० बर्षे नाति "मुख धुनै नसकिने कस्ताे चिसाे पानी भएछ हजुरबुबा" भन्दै आयाे । उनले "हाम्रो पालामा त झन् पानी जमेर हिउँ हुन्थ्यो बाबु" भने । नातिकाे - "अहिले त्यसरी पानी जमेको देखिन्न त किन !" भन्ने प्रतिप्रश्नको जबाफमा उनले अनायास - "बाबू, पहिले जाडाेमा पानी जम्थ्याे, अहिले त पानीकाे सट्टा माया र सम्बन्धहरु जम्न थालेका छन् त्यसैले" भने । उनकाे जबाफ नातिले त के बुझ्याे कुन्नि ! वरिपरि बसेर चिया पिईरहेका उनका छाेराहरु भने चिया पिउन छाेडेर अनाैठाे पाराले आपसमा मुखामुख गरिरहे ।

(उमामहेश्वर मार्ग, कामपा-७, कुमारीगाल)